سياسة الخصوصية

آخر تحديث: ٨ نوفمبر ٢٠٢٦

باختصار

ذاكرو تطبيق مذاكرة لطلبة أولى ثانوي في مصر. بنجمع أقل بيانات ممكنة عشان التطبيق يشتغل، مش بنبيع بيانات حد، ومفيش إعلانات.

أغلب مستخدمينا تحت ١٨ سنة، فكل حاجة هنا مكتوبة عشان الطالب وولي أمره يفهموها.

البيانات اللي بنجمعها

رقم الموبايل: للدخول بكود على واتساب. حساب واحد لكل رقم.

المحافظة والسنة الدراسية: عشان نوريك منهجك ومواعيد امتحاناتك.

رقم ولي الأمر (اختياري): لو كتبته، عشان يوصله تقرير بتقدمك.

اسم الشهرة والصورة الكارتون واللقب: إنت بتختارهم. مش بنطلب اسمك الحقيقي، ومفيش رفع صور.

مذاكرتك: الدروس اللي خلصتها، إجاباتك، غلطاتك، مراجعاتك، نقطك، خطتك، والنوت والرسومات اللي بتكتبها.

المجتمع: أسئلتك وإجاباتك في «سؤال وجواب» (بتتراجع قبل ما تظهر)، وترتيبك في الدوري.

الأجهزة: نوع الجهاز والمتصفح عشان حد الأجهزة لكل حساب، وإذن الإشعارات لو وافقت عليه.

الدفع: صورة إيصال إنستاباي اللي بترفعها، والخطة والتاريخ. مش بنشوف ولا بنحفظ بيانات كارتك أو حسابك البنكي.

الأخطاء والاستخدام: لما حاجة تقع في التطبيق بنسجل الخطأ من غير بياناتك، وبنعد استخدام الصفحات بشكل عام عشان نحسّن التطبيق.

زيكو (الذكاء الاصطناعي)

لما تسأل زيكو، سؤالك وملخص صغير عن مذاكرتك (سنتك، غلطاتك، مراجعاتك) بيتبعت لموديل Gemini من Google عشان يرد. مش بنبعت اسمك ولا رقمك ولا أي حاجة تعرّفك.

مش بنسجل نص أسئلتك ولا ردود زيكو. بنسجل بس إن طلب حصل وكلّف كام.

ذاكرة زيكو: زيكو ممكن يحفظ لحد ٥ ملاحظات قصيرة عن طريقة مذاكرتك عشان يشرحلك أحسن. تقدر تشوفها وتمسحها من الإعدادات ← بياناتي.

زيكو ممكن يغلط. راجع المعلومة المهمة مع كتابك أو مدرسك.

مين بيشوف بياناتك

زمايلك: اسم الشهرة والصورة في الدوري و«إنجازات دفعتك» لو سايب «اظهر باسمي في الدوري» مفتوح. لو قفلته، بيظهر مكانك «طالب».

الصفحة الرئيسية: بتظهر بس لو فتحت «اظهر في قصص الصفحة الرئيسية» بنفسك: صورتك الكارتون واسم الشهرة وإنجاز حقيقي ليك، من غير اسمك الحقيقي ولا مدرستك ولا سنتك. لو الطالب تحت ١٨ سنة، ده بيبقى بعلم ولي أمره.

ولي أمرك: التقرير اللي بيوصله لو كتبت رقمه.

فريق ذاكرو: الدعم والمحتوى والمالية بيشوفوا اللي محتاجينه لشغلهم بس، وكل اللي بيعملوه متسجل.

مش بنبيع ولا بنأجر بياناتك لحد، ومش بنستخدمها في إعلانات.

الخدمات اللي بنستخدمها

Supabase: قاعدة البيانات والدخول (سيرفرات في فرانكفورت، ألمانيا).

Netlify: استضافة الموقع.

Google Gemini: ردود زيكو وقراءة إيصالات الدفع.

WhatsApp (Meta): إرسال كود الدخول وتقارير ولي الأمر.

PostHog: إحصائيات استخدام عامة (سيرفرات في أمريكا).

كل خدمة منهم بتاخد اللي محتاجاه بس عشان تعمل شغلها.

حقوقك

تشوف وتعدّل: بياناتك في الإعدادات، وتقدر تغير اسم الشهرة والصورة والإعدادات في أي وقت.

تمسح: ذاكرة زيكو من الإعدادات ← بياناتي. ولو عايز تمسح حسابك كله، ابعتلنا من «الدعم الفني» (أيقونة السماعة فوق)، وهنمسحه خلال ٣٠ يوم.

توقف: تقدر تقفل الإشعارات والدوري وقصص الصفحة الرئيسية من الإعدادات.

الطلبة تحت ١٨ سنة

ذاكرو معمول لطلبة تحت ١٨ سنة. بنطلب أقل بيانات ممكنة، ومفيش صور حقيقية، ومفيش رسايل خاصة بين الطلبة، وأي كلام في المجتمع بيتراجع قبل ما يظهر.

لو إنت ولي أمر وعايز تعرف إيه اللي متسجل عن ابنك أو بنتك أو تمسحه، ابعتلنا من «الدعم الفني».

الحماية والاحتفاظ

الاتصال مشفر، وكل جدول في قاعدة البيانات محمي بحيث كل طالب يقرأ بياناته بس. أسرار الخدمات مش موجودة في التطبيق نفسه.

بنحتفظ ببياناتك طول ما حسابك موجود. لما تمسحه، بنمسحها، ما عدا سجلات الدفع اللي القانون بيلزمنا نحتفظ بيها.

التغييرات والتواصل

لو غيرنا حاجة مهمة في السياسة دي، هنقولك في التطبيق قبلها. تاريخ آخر تحديث مكتوب فوق.

لأي سؤال: «الدعم الفني» من أيقونة السماعة في التطبيق.